Կիրակի օրը Լոս Անջելեսում (Կալիֆոռնիայի նահանգ) անօրինական ներգաղթյալների զանգվածային ձերբակալությունների դեմ բողոքի ցույցերի ժամանակ տուժել է երկու ոստիկան։
«Երկու մարդ մոտոցիկլներով փորձել է ճեղքել պատնեշը։ Մոտոցիկլավարների կողմից վրաերթի ենթարկվելուց հետո տուժել է երկու ոստիկան։ Երկու վարորդներն էլ ձերբակալվել են։ Ոստիկանները բժշկական օգնություն են ստանում դեպքի վայրում»,- X-ում հայտնել է տեղի ոստիկանությունը։
Իրավապահ մարմինները փորձում են Լոս Անջելեսի գլխավոր մայրուղին ազատել երթեւեկության համար, որի մի հատվածը փակվել է ցուցարարների կողմից: Տեղի լրատվամիջոցների տվյալներով՝ ցուցարարները բախվում են ոստիկանների հետ՝ նրանց վրա շշեր եւ քարեր նետելով: Անկարգությունների մասնակիցները հրկիզել են առնվազն հինգ մեքենա:
Լոս Անջելեսի քաղաքապետ Քարեն Բասը մամուլի ասուլիսում հայտնել է, որ սրացումը պայմանավորված է դաշնային կառավարության գործողություններով, այդ թվում՝ ԱՄՆ նախագահ Դոնալդ Թրամփի՝ Լոս Անջելեսում բողոքի ցույցերը ճնշելու համար Կալիֆոռնիայի ազգային գվարդիա ուղարկելու որոշմամբ։
«Ես հույս ունեի կանխել դա։ Ես փորձում էի բացատրել վարչակազմին, որ եթե Ազգային գվարդիան տեղակայվի Լոս Անջելեսում, դա կստեղծի քաոսի զգացողություն, եւ դա վերջին բանն է, որ մեր քաղաքին պետք է։ «Մեր քաղաքը դեռ փորձում է վերականգնվել անտառային հրդեհներից, եւ հաշվի առնելով դա՝ այս իրավիճակում հայտնվելը իսկապես ողբերգական է»,- ասել է նա։ Բասն ավելացրել է, որ ուղիղ չի խոսել Թրամփի հետ, բայց խոսել է մաքսային եւ սահմանային պաշտպանության ծառայության ղեկավար Թոմ Հոմանի եւ արդարադատության նախարար — գլխավոր դատախազ Փեմ Բոնդիի հետ։