Հայաստանի արտաքին գործերի նախարարությունը բազմիցս հայտնել է տարբեր հարթակներում, դրանց թվում՝ մասնագիտացված ձևաչափերով հանդիպումների ընթացքում, Բաքվում պահվող անձանց վերադարձի հարցի բարձրացման մասին։ Դրա մասին հայտարարել է Հայաստանի արտաքին գործերի և միջազգային առևտրի նախարարի տեղակալ Ռոբերտ Աբիսողոմոնյանը՝ մեկնաբանելով հարցը, թե արդյոք կա՞ հնարավորություն, որ COP17-ի շրջանակում այս հարցը կբարձրացվի։ Նրա ասելով՝ հարցը կարող է քննարկվել նաև COP17-ին ժամանող բարձրաստիճան պատվիրակությունների հետ երկկողմ հանդիպումների շրջանակում։ Միևնույն ժամանակ նա ընդգծել է, որ պահվող անձանց վերադարձը նախևառաջ վերաբերում է հումանիտար օրակարգին և քննարկվում է համապատասխան կազմակերպությունների շրջանակում։ «Ինչ վերաբերում է Բաքվում պահվող անձանց, ապա, ինչպես գիտեք, և ինչպես արտաքին գործերի նախարարությունը բազմիցս հայտնել է իր հրապարակային հայտարարություններում, այս հարցը բարձրացվում է տարբեր հարթակներում, մասնավորապես՝ մասնագիտացված և ոլորտային հարթակներում հանդիպումների ընթացքում։ COP17-ը հիմնականում նվիրված է բնապահպանական օրակարգին։ Հնարավոր է, որ այս հարցերը քննարկվեն նաև COP17-ին ժամանող բարձրաստիճան պատվիրակությունների հետ երկկողմ հանդիպումների շրջանակում։ Սակայն սա նախևառաջ հումանիտար հարց է, որը քննարկվում է համապատասխան հումանիտար կազմակերպությունների շրջանակում»,- մասնավորապես նշել է նախարարի տեղակալը։