Իսրայելի բնակավայրերի և ազգային առաքելությունների նախարար Օրիտ Ստրուկի դուստրը՝ Շոշանա Ստրուկը, մահացած է գտնվել Գալիլեայի շրջանի Ամիրիմ բնակավայրում վարձակալած ամառանոցում: Անցյալ տարի աղջիկը սեռական բռնության մեջ էր մեղադրել իր մորը, հորը և եղբորը։ Շոշանա Ստրուկի մահվան համար հետաքննություն է սկսվել:
Դեպքի վայր ժամանած ոստիկանները կատարվածի մասին հայտնել են իշխանություններին, իսկ Շոշանա Ստրուկի մարմինն ուղարկվել է դատաբժշկական փորձաքննության կենտրոն՝ մահվան ստույգ պատճառը պարզելու համար: Իշխանությունները հայտարարել են գործով հետաքննություն սկսելու մասին: Նախնական տվյալները մատնանշում են, որ Շոշանան, հավանաբար, ինքնասպան է եղել, սակայն նրա մահը կասկածելի է համարվում:
Օրիտ Ստրուկը սոցիալական ցանցերում արված իր հայտարարության մեջ հաստատել է դստեր մահը՝ ասելով. «Սիրտս կոտրված է մեր սիրելի դստեր՝ Շոշանայի մահվան պատճառով»:
Շոշանա Ստրուկը Իսրայելում հանրության լայն ուշադրությանն էր արժանացել անցյալ տարի հրապարակված տեսանյութում արված հայտարարությունների պատճառով: Իտալիայում բնակվող Ստրուկը սոցիալական ցանցերում տեղադրված տեսանյութում իր մորը՝ Օրիտ Ստրուկին, հորը և եղբորը մեղադրել էր իր նկատմամբ սեռական ոտնձգությունների և բռնության մեջ: Երիտասարդ կինը պնդում էր, որ շատ վաղ տարիքում իրեն տարել են «պեդոֆիլիկ ծիսակարգերի» և պարբերաբար ենթարկել դաժան վերաբերմունքի: Իր մեղադրանքները հնչեցնելուց հետո, ըստ հաղորդումների, Շոշանա Ստրուկը մեկնել էր Իսրայել՝ պաշտոնական բողոք ներկայացնելու համար՝ պնդելով, որ իր կրտսեր քույրերն ու եղբայրները նույնպես ֆիզիկական բռնության են ենթարկվել ծնողների կողմից: Այս մեղադրանքների պատճառով իսրայելական մամուլում որոշ ժամանակով հրապարակումների արգելք էր սահմանվել:
Շոշանան հայտարարել էր, որ չարաշահումները արձանագրված են եղել, ինչից հետո նա հեռացել էր Իսրայելից, իսկ ավելի ուշ վերադարձել Թել Ավիվ՝ իր ընտանիքի դեմ բողոք ներկայացնելու համար: Դիմելով ոստիկանությանը պաշտպանության խնդրանքով՝ Շոշանան ասել էր. «Ես հասկացա, որ հանցավոր տարրերն ինձ սպառնում են, և ամուսնուս հետ վերադարձա Իսրայել: Ես խնդրում եմ իսրայելական ոստիկանությանը պաշտպանել ինձ իմ ընտանիքից»:
Շոշանան հայտարարել էր, որ ծնողների կողմից ենթարկվել է սեռական բռնության, և դա նկարահանվել է: Այս ամենը հոգեբանական մեծ ազդեցություն էր թողել նրա վրա և հանգեցրել Իսրայելից հեռանալուն: Հետագայում նա վերադարձել էր Թել Ավիվ և ոստիկանությունում բողոք ներկայացրել իր ծնողների դեմ՝ սեռական բռնության համար: Հայտնի է նաև, որ Շոշանայի եղբայրը՝ Սվիկի Ստրուկը, 2007 թվականին մեղադրվել էր պաղեստինցի երեխայի առևանգման և տանջանքների ենթարկելու մեջ: