Իրանի նախագահ Մասուդ Փեզեշքիանը հայտարարել է, որ երկիրը վարում է «լայնածավալ տնտեսական պատերազմ և անվտանգային ոլորտում պատերազմ», սակայն, չնայած ճնշմանը և ճգնաժամերին, պահպանում է ուժն ու միասնությունը, հաղորդում է Mehr-ը։
Կիրակի օրը, ելույթ ունենալով Իսլամական Հանրապետության հիմնադրի իդեալներին հավատարմության երդման վերականգնման արարողությանը, Փեզեշքիանը հարգանքի տուրք է մատուցել զոհվածների, Իրանի նախկին գերագույն առաջնորդի, հրամանատարների, գիտնականների, ուսանողների, զինծառայողների և խաղաղ բնակիչների հիշատակին։
Ըստ Իրանի նախագահի, կառավարությունը ստիպված է միաժամանակ դիմակայել պատերազմին, պատժամիջոցներին, ճնշման տարբեր ձևերին և շարունակվող սպանություններին, ինչպես նաև ջրամատակարարման, էլեկտրամատակարարման, գազի, վառելիքի, էկոլոգիայի և բանկային համակարգի ոլորտներում առկա լուրջ խնդիրներին։
«Թշնամիները պատկերացնում էին, որ իրենց ճնշման և գործողությունների ազդեցության տակ Իրանը կփլուզվի։ Բայց ոչ միայն դա տեղի չունեցավ, այլև իրանցի ժողովրդի ուժն ու միասնությունը զարմացրին ողջ աշխարհին», — հայտարարել է Փեզեշքիանը։
Նախագահն ընդգծել է իրանցիների տոկունությունը՝ ասելով, որ վերլուծաբաններին դժվար է բացատրել, թե ինչպես է երկիրը կարողացել դիմանալ այսքան ուժեղ ճնշմանը։
«Մեր սիրելի ժողովուրդն իսկապես հրաշք գործեց», — ասել է նա։
Փեզեշքիանը նաև հայտարարել է, որ կառավարությունն անում է հնարավոր ամեն ինչ՝ ներկայիս դժվարությունները հաղթահարելու համար։
«Իհարկե, մենք ամաչում ենք ժողովրդի առաջ, որ խնդիրները պահպանվում են։ Բայց քանի դեռ մեր մարմիններում շունչ կա, մենք ծառայելու ենք մեր սիրելի ժողովրդին, աշխատելու ենք նրա կյանքի և բարեկեցության բարելավման ուղղությամբ և ուժով հաղթահարելու ենք այս ճգնաժամերը», — ընդգծել է Իրանի նախագահը։
Վերջում Փեզեշքիանը մեջբերել է Ղուրանի այաներ այն մարդկանց մասին, ովքեր ժխտում են այն, ինչ չեն հասկանում, նշելով, որ պատմությունն արդեն ցույց է տվել նման մարդկանց ճակատագիրը։