Samsung-ը ներկայացրել է Galaxy A16 սմարթֆոնի հերթական տարբերակը։ Տասը օր առաջ արտադրողը հայտարարել է Galaxy A16 5G մոդելի մասին։ Այժմ Samsung-ի ֆրանսիական գրասենյակը ներկայացրել է սարքի 4G տարբերակը։ Ինչպես 5G տարբերակի դեպքում, այնպես էլ 4G տարբերակի համար ընկերությունը կթողարկի ծրագրային ապահովման թարմացումներ (ՕՀ-ի նոր տարբերակներ և անվտանգության շտկումներ) մինչև 2030-ը:
Galaxy A16 (4G) մոդելը գրեթե ամբողջությամբ կրկնօրինակում է 5G տարբերակի բնութագրերը։ Սարքն ունի 6,7 դյույմանոց OLED էկրան՝ 2340×1080 պիքսել կետայնությամբ և 90 Հց թարմացման արագությամբ։ Սմարթֆոնը ստացել է 5000 մԱ/ժ հզորությամբ մարտկոց՝ 25 Վտ լիցքավորման աջակցությամբ։
Galaxy A16 (4G) հիմնական տեսախցիկի հավաքածուն բաղկացած է 50 ՄՊ, 5 ՄՊ և 2 ՄՊ սենսորներից: Առջևի մասում տեղադրված է 13 ՄՊ տեսախցիկ։ Սմարթֆոնի հաստությունը 7,9 մմ է։ Այն ունի ջրի և փոշու նկատմամբ դիմացկունություն՝ ըստ IP54 ստանդարտի։
Galaxy A16 (4G) հիմնական տարբերությունը պրոցեսորն է: Սմարթֆոնի այս տարբերակում կիրառվում է MediaTek Helio G99 պրոցեսոր (երկու Cortex-A76 միջուկ 2,2 ԳՀց հաճախականությամբ և վեց Cortex-A55 2,0 ԳՀց հաճախականությամբ, Mali-G57 MC2 GPU): Galaxy A16 (5G) մոդելը եվրոպական շուկայում առաջարկվում է Samsung Exynos 1330 չիպով, իսկ Հնդկաստանում և Թաիլանդում՝ MediaTek Dimensity 6300 պրոցեսորով։
Սարքի հիմնական կոնֆիգուրացիան առաջարկվում է նույն 4 ԳԲ օպերատիվ հիշողությամբ և 128 ԳԲ մշտական հիշողությամբ: Վերջինս կարող է ավելացվել մինչև 1 ՏԲ՝ microSD հիշողության քարտերի աջակցության շնորհիվ: Կլինի նաև 6 ԳԲ օպերատիվ և 256 ԳԲ ներկառուցված հիշողություն ունեցող տարբերակ: Galaxy A16 (4G) վրա 3,5 մմ աուդիո խցիկի առկայության մասին տեղեկություն չկա: Այնուամենայնիվ, 5G տարբերակը նույնպես չունի:
Ընկերության մամուլի հաղորդագրությունում ոչինչ չի ասվում սարքի գնի մասին։ Galaxy A16 4G-ը վաճառքում կհայտնվի նոյեմբերին։ Սմարթֆոնը հասանելի կլինի մոխրագույն, կանաչ և կապույտ տարբերակներով։