Մեծ Բրիտանիան Ֆրանսիայի հետ քննարկում է 2025թ. ամռան սկզբին Պաղեստինի ճանաչումը հայտարարելու ծրագրերը: Ըստ բրիտանական The Guardian թերթի, այս քայլը կարող է համընկնել հունիսի 2-4-ը ՄԱԿ հովանու ներքո կազմակերպվող «երկու պետություն երկու ժողովուրդների համար» ծրագրի իրականացման վերաբերյալ միջազգային համաժողովին:
Չորեքշաբթի ելույթ ունենալով բրիտանական խորհրդարանական հանձնաժողովում՝ Մեծ Բրիտանիայի արտաքին գործերի նախարար Դեւիդ Լեմին առաջին անգամ հաստատել է, որ Լոնդոնը եւ Փարիզը քննարկում են Պաղեստինի ճանաչման հարցը՝ կապված Սաուդյան Արաբիայի կողմից կազմակերպվող առաջիկա համաժողովի հետ: Միեւնույն ժամանակ, նա ավելի վաղ ընդգծել էր, որ Պաղեստինի պետականության ճանաչման համար անհրաժեշտ պայման կլինի արմատական ՀԱՄԱՍ շարժման ներկայացուցիչների ամբողջական հեռացումը իշխանությունից Գազայի հատվածում եւ շարժման առաջնորդների հեռանալն ինքնավարությունից։
Ինչպես նշվել է հոդվածում, ՄԱԿ Անվտանգության խորհրդի երկու մշտականանդամների կողմից Պաղեստինի ճանաչումը կարող է նոր լիցք հաղորդել պաղեստինա-իսրայելական կարգավորման ջանքերին, սակայն դրան հասնելու ճանապարհին կան բազմաթիվ դիվանագիտական խոչընդոտներ։ Հիմնականներից մեկը կլինի Իսրայելի դիմադրությունը, որի ղեկավարությունը կարծում է, որ Պաղեստինի ճանաչումը կամրապնդի ՀԱՄԱՍ-ի եւ Իրանի դիրքերը։ Ավելին, ինչպես Լեմին ընդգծել է իր ելույթում, Լոնդոնը չի ցանկանում, որ Մեծ Բրիտանիայի եւ Ֆրանսիայի կողմից Պաղեստինի ճանաչումը զուտ խորհրդանշական ժեստ լինի։ Նրա խոսքով՝ նման քայլը պետք է արվի այն ժամանակ, երբ այն կարող է առավելագույն ազդեցություն ունենալ՝ դեպի լավը փոխելով իրավիճակը տարածաշրջանում։
Ապրիլի 9-ին Ֆրանսիայի նախագահ Էմանուել Մակրոնը հայտարարել էր, որ Փարիզը կարող է հունիսին ճանաչել Պաղեստինի պետականությունը։ 2024թ., երբ իրավիճակը Մերձավոր Արեւելքում վատթարացավ, Իռլանդիայի, Իսպանիայի եւ Նորվեգիայի իշխանությունները հայտարարեցին Պաղեստին պետությունը ճանաչելու մասին։ Իսրայելն արձագանքեց՝ հայտնելով Դուբլինից, Մադրիդից եւ Օսլոյից իր դեսպաններին խորհրդակցությունների համար հետ կանչելու մասին։ Միաժամանակ հրեական պետության արտաքին գործերի նախարարություն են կանչվել Իռլանդիայի, Իսպանիայի եւ Նորվեգիայի դիվանագիտականներկայացուցչությունների ղեկավարները։