Շվեդիայի կառավարությունում հայտնել են, որ դադարեցրել են ուղիղ համագործակցությունը Վրաստանի իշխանությունների հետ, սակայն հասարակական կազմակերպությունների նախագծերի ֆինանսավորումը կշարունակվի, արտաքին առեւտրի եւ միջազգային համագործակցության նախարար Բենջամին Դուզայի այս մեկնաբանությունն է ներկայացրել Dagens Nyheter-ը։
Նախարարն ասել է, որ Շվեդիան դադարեցնում է ուղիղ համագործակցությունը Վրաստանի կառավարական գերատեսչությունների հետ, եւ այդ որոշումը ընդունվել է դեռ մինչեւ հոկտեմբերի 26-ի քվեարկությունը, երկրում դեմոկրատիայի նահանջի, մասնավորապես՝ «օտարերկրյա գործակալների» մասին աղմկահարույց օրենքի ընդունման պատճառով։
«Խոսքը հարկային մարմինների հետ համագործակցության մասին է, ինչը մենք համարում ենք ոչ տեղին ներկա իրադրությունում»,- նշել է Բենջամին Դուզան։
Նա ավելացրել է, որ Ստոկհոլմը պատրաստ է վերականգնել համագործակցությունը, եթե Վրաստանը կրկին փոխի քաղաքական գիծը, ինչը քիչ հավանական է թվում, քանի դեռ «Վրացական երազանքը» մնում է իշխանությունում։
«Եթե հետո պարզվի, որ Վրաստանը լրջորեն է ընկալում իր շարժումը դեպի ԵՄ եւ գնահատում է հարաբերությունները Եվրամիության հետ, Շվեդիայի դռները բաց են»,- ասել է նախարարը։
Ընդհանուր շվեդական օգնությունը Վրաստանի համար հասել է տարեկան 190 մլն շվեդական կրոնի։ 2024թ. 25 մլն կրոն (ավելի քան 2 մլն եվրո) վերաբաշխվել է քաղաքացիական հասարակության նախագծերի համար։
«Այդ միջոցներն ուղղվում են առաջին հերթին քաղաքացիական հասարակությանը ֆինանսական ռեսուրսներով եւ իրավաբանական հնարավորություններով աջակցելու համար, որպեսզի նրանք կարողանան շարունակել աշխատել՝ չնայած մտցված օրենսդրական սահմանափակումներին»,- ասել է Բենջամին Դուզան։