Աբելարդո դե լա Էսպրիելյան երդվել է որպես Կոլումբիայի նախագահ և հայտարարել զինված խմբավորումների դեմ կոշտ գծի մասին

Պահպանողական Աբելարդո դե լա Էսպրիելյան ստանձնել է Կոլումբիայի նախագահի պաշտոնը՝ ուրբաթ երդվելով երկրի հարավ-արևմուտքում գտնվող Կալի քաղաքում, այլ ոչ թե մայրաքաղաք Բոգոտայում, ինչպես ընդունված է ավանդույթի համաձայն, հայտնել է Associated Press-ը։Կալիի ընտրությունը, որտեղ անօրինական զինված խմբավորումների ակտիվությունը շարունակում է բարձր մնալ, պետք է ընդգծի պետության նոր ղեկավարի կոշտ գիծը դրանց դեմ պայքարում։48-ամյա դե լա Էսպրիելյան փոխարինել է Գուստավո Պետրոյին այն բանից հետո, երբ հունիսի 21-ին հաղթանակ է տարել նախագահական ընտրությունների երկրորդ փուլում՝ հաղթելով հեռացող նախագահի դաշնակից, սենատոր Իվան Սեպեդային։ Ավելի վաղ դե լա Էսպրիելյան, որը հայտնի է «Վագր» մականունով, երբեք պետական պաշտոններ չէր զբաղեցրել։ Իր քարոզարշավը նա ֆինանսավորել է որպես փաստաբան և ձեռնարկատեր վաստակած կարողության հաշվին։Երդմնակալության արարողությունն անցկացվել է համալսարանական լսարանում՝ Կոնգրեսի ներկայությամբ։ Մասնակցել են Իսպանիայի թագավոր Ֆիլիպ VI-ը, ԱՄՆ գլխավոր դատախազի պաշտոնակատար Թոդ Բլանշը, ՖԻՖԱ նախագահ Ջանի Ինֆանտինոն, ինչպես նաև Արգենտինայի նախագահ Խավիեր Միլեյը, Էկվադորի նախագահ Դանիել Նոբոան և Չիլիի նախագահ Խոսե Անտոնիո Կաստը։Արարողությունից հետո նոր նախագահը մտադիր է այցելել Կալիում գտնվող ռազմական գումարտակ և ելույթ ունենալ զինծառայողների առջև։ Միաժամանակ, նա ծրագրում է զինված խմբավորումներին հանձնվելու անհրաժեշտության ազդակ հղել, հակառակ դեպքում նրանց անդամները կհայտարարվեն «ռազմական թիրախներ»։Երդմնակալության ժամանակ հիմնական խնդիրը անվտանգության միջոցառումներն էին։ Քաղաքում տեղադրվել էին բազմաթիվ անցակետեր, որտեղ ստուգում էին մեքենաները և փնտրում կասկածելի անձանց ու հնարավոր պայթուցիկ սարքեր։Կոլումբիայի տարածքում գործում են տարբեր զինված խմբավորումներ, որոնք մրցակցում են եկամտի անօրինական աղբյուրների, այդ թվում՝ թմրանյութերի առևտրի և օգտակար հանածոների ապօրինի արդյունահանման վերահսկողության համար։ Դրանց թվում են Կոլումբիայի հեղափոխական զինված ուժերից (FARC) առանձնացած կազմավորումները, որոնք չեն ճանաչել 2016 թվականի խաղաղության համաձայնագիրը, Clan del Golfo կարտելը և Ազգային ազատագրական բանակը (ELN)։Դե լա Էսպրիելյան խոստացել էր հրաժարվել Պետրոյի քաղաքականությունից, որը փորձում էր բանակցություններ վարել զինված խմբավորումների հետ, և շեշտը դնել ուժային հակազդեցության վրա։ Նրա կարծիքով՝ ընթացիկ խաղաղության գործընթացը չի բերել սպասված արդյունքների։Դե լա Էսպրիելյայի իշխանության գալը կարող է ուժեղացնել աջ շրջադարձը Լատինական Ամերիկայում։ Նոր նախագահը, որն ունի Կոլումբիայի և ԱՄՆ քաղաքացիություն, ընտրություններից առաջ ստացել էր Դոնալդ Թրամփի աջակցությունը։Դե լա Էսպրիելյան հայտարարել է, որ մտադիր է Կոլումբիան միացնել «Ամերիկաների վահան»-ին՝ թմրանյութերի ապօրինի շրջանառության դեմ պայքարի տարածաշրջանային նախաձեռնությանը, որը ստեղծվել է Թրամփի կազմակերպած մարտյան գագաթաժողովից հետո։ Բացի այդ, նա խոստացել է վերականգնել դիվանագիտական հարաբերություններն Իսրայելի հետ և խզել դրանք Կուբայի ու Նիկարագուայի հետ, որոնց համարում է «բռնապետական» պետություններ։Միևնույն ժամանակ, նոր նախագահը ստիպված կլինի բախվել Պետրոյի կոշտ ընդդիմությանը։ Պետության հեռացող ղեկավարը սկզբում հրաժարվել էր ճանաչել դե լա Էսպրիելյայի հաղթանակը և հայտարարել էր ընտրություններում հնարավոր կեղծիքների մասին՝ պնդելով, թե հազարավոր արձանագրություններում արդյունքները փոփոխվել են։ Միջազգային դիտորդներն ու Կոլումբիայի ընտրական մարմինները մերժել են այդ մեղադրանքները։