ՀԱՊԿ անդամ երկրները Հայաստանին համարում են կազմակերպությունում դաշնակից:
Այս մասին ՌԻԱ Նովոստի-ին հայտարարել է միավորման գլխավոր քարտուղար Թաալաթբեկ Մասադիկովը:
«Հայաստանը հենց սկզբից եղել է ակտիվ և ներդաշնակ անդամ պետություն՝ արժանի ներդրում ունենալով կոլեկտիվ ներուժի ամրապնդման գործում,
և ՀԱՊԿ անդամ պետությունները նախկինի պես դիտարկում են այդ երկիրը որպես կազմակերպությունում դաշնակից»,- հայտարարել է Մասադիկովը:
Նա հիշեցրել է, որ ՀԱՊԿ անդամ պետությունները բազմիցս հաստատել են Երևանի հետ բոլոր, առանց բացառության, հարցերի քննարկման պատրաստակամությունը,
որոնք վերաբերում են համատեղ աշխատանքին հայկական կողմի լիարժեք մասնակցության վերականգնմանը:
Հիշեցնենք, որ ՀԱՊԿ-ում Ռուսաստանի մշտական ներկայացուցիչ Վիկտոր Վասիլևը ՌԻԱ Նովոստի-ին հայտարարել էր,
որ ՀԱՊԿ մարմիններում Հայաստանին ձայնի իրավունքից զրկելու համար անհրաժեշտ է կոնսենսուս:
Նրա խոսքով՝ ՀԱՊԿ Հավաքական անվտանգության խորհրդի հերթական նստաշրջանը տեղի կունենա Մոսկվայում նոյեմբերի 11-ին, և պետությունների ղեկավարները,
հավանաբար, կքննարկեն տվյալ հարցը:
Երևանը սառեցրել է մասնակցությունը ՀԱՊԿ-ին 2024 թվականին:
Կազմակերպության կանոնադրության 20-րդ հոդվածի համաձայն՝ անդամ պետությունների կողմից երկու տարվա ընթացքում կազմակերպության բյուջեի նկատմամբ պարտքի մարման պարտավորությունների չկատարման դեպքում Հավաքական անվտանգության խորհուրդը որոշում է կայացնում կազմակերպության շրջանակներում քվոտավորված պաշտոններում այդ պետության քաղաքացիների առաջադրման իրավունքի կասեցման, ինչպես նաև կազմակերպության մարմիններում ձայնի իրավունքից զրկելու մասին՝ մինչև պարտքի ամբողջական մարումը:
Բացի այդ, կանոնադրության 20-րդ հոդվածում նշվում է, որ անդամ պետության կողմից կանոնադրության դրույթները, Խորհրդի որոշումները և դրանց ի կատարումն ընդունված կազմակերպության այլ մարմինների որոշումները չկատարելու դեպքում Հավաքական անվտանգության խորհուրդը կարող է կասեցնել նրա մասնակցությունը կազմակերպության մարմինների գործունեությանը կամ հեռացնել: Այդ պետության նկատմամբ տվյալ հարցերով որոշումներն ընդունվում են առանց նրա ձայնը հաշվի առնելու: