Պակիստանի և Հնդկաստանի միջև հակամարտությունը կարող է վերաճել միջուկային դիմակայության։ Դրա մասին Al Jazeera հեռուստաալիքի եթերում զգուշացրել է Պակիստանի պաշտպանության նախարար Խավաջա Ասիֆը։
«Աշխարհի հանրությունը պետք է ուշադրություն դարձնի այս վտանգավոր վեճին, որը կարող է վերաճել միջուկային դիմակայության։ Երկու երկրներն էլ միջուկային տերություններ են»,- նշել է նախարարը։
Ապրիլի 22-ին զինված անձինք ահաբեկչական հարձակում են իրականացրել զբոսաշրջային հայտնի Պահալգամ քաղաքում (Ջամմուի և Քաշմիրի Հնդկաստանի միութենական տարածք): Զոհվել է Հնդկաստանի 25 քաղաքացի և մեկ նեպալցի, շատ մարդիկ էլ վիրավորվել են։ Հարձակվողներին հաջողվել է փախչել։ Հնդկաստանի հետախուզական գործակալությունները ապացույցներ են գտել, որոնք վկայում են Փահալգամում «Լաշկար-է-Թայբա» ահաբեկչական խմբավորման դեմ հարձակման մեջ Պակիստանի միջգերատեսչական հետախուզության (ISI) ներգրավվածության մասին, հաղորդում է The Hindustan Times պարբերականը՝ վկայակոչելով իր աղբյուրներին։
Հնդկաստանի իշխանությունները գրեթե կիսով չափ կրճատել են Իսլամաբադում իրենց դեսպանատանը գտնվող մարդկանց թիվը, Պակիստանի դիվանագիտական առաքելության ռազմական խորհրդականներին հայտարարել են անցանկալի անձ և փակել սահմանին գտնվող Աթթարիի կարևորագույն անցակետը։ Հնդկաստանի իշխանությունները կասեցրել են նաև Իսլամաբադի հետ ջրային ռեսուրսների բաշխման և Պակիստանի քաղաքացիներին վիզաներ տրամադրելու վերաբերյալ համաձայնագիրը։