Գյումրիում կայացած քաղաքի տոնական միջոցառումները այս տարի անցան առանց երկրորդ նախագահ Ռոբերտ Քոչարյանի ներկայության կամ մասնակցության։ Ավելին՝ Քոչարյանի մերձավոր շրջապատից և թիմակիցներից ոչ ոք չի հրավիրվել տոնական միջոցառումներին, ինչը քաղաքական շրջանակներում մեկնաբանվում է որպես Գյումրիի և նախկին նախագահի վերջնական հեռացում միմյանցից։
Համաձայն ստացված տեղեկությունների՝ Գյումրվա տոնի ամբողջ ֆինանսավորումն ու կազմակերպչական ծախսերը ստանձնել է գործարար Սամվել Կարապետյանի «Տաշիր» խմբի ընկերությունը, որը վերջին տարիներին զգալի ներդրումներ է կատարում Շիրակի մարզում։ Տաշիրի հովանավորությամբ անցկացված տոնը եղել է մեծածավալ, մասնակցել են տեղացի ու հրավիրված արտիստներ, իսկ քաղաքի կենտրոնը ձևավորվել է նոր ձևաչափով՝ առանց որևէ քաղաքական շեշտադրման։
Քաղաքական վերլուծաբանների կարծիքով՝ այս քայլը ոչ միայն կազմակերպչական որոշում էր, այլ նաև հստակ քաղաքական ուղերձ, որ Գյումրին այլևս չի ասոցացվում Քոչարյանի անունով։ Մի ժամանակ Քոչարյանի ազդեցության գոտի համարված Գյումրին այսօր կանգնած է նոր գործարար և քաղաքական հավասարակշռությունների փուլում, որտեղ գերակշռում են ոչ թե նախկին կապերը, այլ՝ տնտեսական նախաձեռնությունները։
Տոնի անցկացման հանգամանքները, մասնավորապես՝ Քոչարյանի թիմի բացակայությունը և Տաշիրի առաջատար դերը, ըստ մասնագետների, կարող են ազդանշան լինել նաև՝ ՀՀ ներքաղաքական նոր վերադասավորությունների, որտեղ նախկին նախագահը աստիճանաբար կորցնում է իր երբեմնի հենարանները մարզերում։