ԱՄՆ նախագահ Դոնալդ Թրամփի վարչակազմն աշխատանքից ազատել է ԱՄՆ Միջազգային զարգացման գործակալության (USAID) գլխավոր տեսչին։ Այս մասին հայտնել է The Hill թերթը, որին այս տեղեկությունը հաստատել է իրազեկ զրուցակիցը։
Ինչպես նշվել է, դա տեղի է ունեցել այն բանից հետո, երբ վերահսկիչ գործակալությունը հրապարակել է հաշվետվություն արտաքին օգնության սառեցման քննադատությամբ։
Թերթը գրել է, որ տեղի ժամանակով ժամը 18-ին մոտ աշխատանքից ազատվել է USAID գլխավոր տեսուչ Փոլ Մարտինը։ Զրուցակցի խոսքով՝ աշխատանքից ազատման պատճառները չեն ներկայացվել։
Նշվել է, որ երկուշաբթի՝ փետրվարի 10-ին, Մարտինի գրասենյակը հրապարակել է 6 էջանոց հաշվետվություն, որտեղ նշվել է, թե ինչպես է պետդեպարտամենտի կողմից արտասահմանյան օգնության ծրագրերի վերջին դադարը եւ USAID աշխատակիցների կրճատումները «ռիսկեր եւ մարտահրավերներ ստեղծել USAID 8,2 մլրդ դոլարի մարդասիրական օգնության համար, որը պարտադիր էր վճարման համար, բայց չի վճարվել»:
«Մասնավորապես, USAID գործող վերահսկողության մեխանիզմները, թեեւ նախկինում հայտնաբերված թերություններով, այժմ հիմնականում չեն գործում՝ հաշվի առնելով վերջին հրահանգները եւ անձնակազմի գործողությունները»,- նշվել է հաշվետվությունում:
Օրենքով, գրել է թերթը, վարչակազմը պարտավոր է գլխավոր տեսչին ազատելուց առաջ 30 օրվա ընթացքում այդ մասին տեղեկացնել Կոնգրեսին՝ պատճառների նշմամբ։
Գլխավոր տեսուչները պատասխանատու են պետական մարմիններում չարաշահումների, խարդախությունների եւ վատնումների հետաքննության եւ ստուգումների համար: Նրանք կարող են աշխատել մի քանի վարչակազմերում, ինչպես նաեւ հրապարակել իրենց առաջարկներն ու հետաքննությունների բացահայտումները:
ԱՄՆ նախագահի վարչակազմը աշխատանքի առաջին օրերին դադարեցրել է USAID միջազգային օգնության ֆինանսավորումը գործակալության միջոցով, որը Թրամփը, ըստ իրեն, ցանկանում է լուծարել։