Bank of America-ի վերլուծաբանների կանխատեսմամբ՝ եթե ԱՄՆ-ի և Իրանի միջև ռազմական գործողությունների ընթացիկ ինտենսիվությունը պահպանվի, իսկ Հորմուզի նեղուցի ապաշրջափակման հարցում առաջընթաց չլինի, տարվա երկրորդ կեսին նավթի համաշխարհային գները կլինեն մեկ բարելի դիմաց 95-120 դոլարի սահմաններում։ Այս մասին, վկայակոչելով բանկի զեկույցը, հայտնում է «Associated Press» (AP) գործակալությունը։Այս մակարդակում նավթի գների պահպանումը հնարավոր է միայն այն պայմանով, որ Հորմուզի նեղուցով նավագնացությունը շարունակի արգելափակված մնալ։ Իսկ եթե էսկալացիայի հետևանքով Մերձավոր Արևելքում վնասվի էներգետիկ խոշոր ենթակառուցվածք, ապա նավթի գինը կարող է հասնել մինչև 150 դոլարի։Միևնույն ժամանակ, Bank of America-ի բազային սցենարով նախատեսվում է, որ երկրորդ կիսամյակում նավթի միջին գինը կկազմի 83 դոլար՝ ենթադրելով Հորմուզի նեղուցով նավթի տարանցման աստիճանական ավելացում։ԱՄՆ-ն և Իսրայելն Իրանի դեմ պատերազմն սկսել են փետրվարի 28-ին։ Հունիսին Վաշինգտոնն ու Թեհրանը ստորագրել էին փոխըմբռնման հուշագիր, որով նախատեսվում էր ռազմական գործողությունների անհապաղ դադարեցում բոլոր ճակատներում, այդ թվում՝ Լիբանանում։ Սակայն հուլիսի 8-ի գիշերը ԱՄՆ-ն վերսկսել է Իրանի ուղղությամբ լայնամասշտաբ հարվածները՝ նրան մեղադրելով Հորմուզի նեղուցին վերաբերող ձեռք բերված համաձայնությունների պայմանները խախտելու մեջ։ Այս նեղուցով է փոխադրվում նավթի համաշխարհային առևտրի ծավալի մոտ 25%-ը և հեղուկացված բնական գազի շուրջ 20%-ը։ Դրանից հետո ԱՄՆ վարչակազմն, ըստ էության, ազդարարել է Իրանի դեմ լայնամասշտաբ ռազմական ուժի կիրառման դադարեցման և պատժամիջոցների միջոցով նրան տնտեսական շրջափակման ենթարկելու փորձի անցնելու մասին։
2026-09-10