ԱՄՆ Կոնգրեսի միջանկյալ ընտրություններից մի քանի շաբաթ առաջ ամերիկացիների 71%-ը կարծում է, որ երկիրը շարժվում է սխալ ուղղությամբ։ Սա Դոնալդ Թրամփի երկրորդ նախագահական ժամկետի ամենաբարձր ցուցանիշն է, վկայում են NBC News Decision Desk Poll-ի՝ SurveyMonkey-ի հետ համատեղ անցկացված հարցման արդյունքները։ Չափահաս ամերիկացիների շրջանում Թրամփի հավանության վարկանիշը նվազել է մինչև 34%՝ հասնելով նրա երկրորդ ժամկետի ընթացքում, այս հետազոտության տվյալներով, ամենացածր մակարդակին։ Հարցվածների 66%-ը չի հավանում նախագահի գործունեությունը, ընդ որում 51%-ը հայտարարել է, որ կտրականապես չի աջակցում նրա աշխատանքին։ Գրանցված ընտրողների շրջանում հավանության և չհավանության հարաբերակցությունը կազմում է 39%՝ 61%-ի դիմաց։ Միաժամանակ այս խմբի հարցման մասնակիցների 55%-ը կնախընտրեր, որ Կոնգրեսը վերահսկեն դեմոկրատները, իսկ 45%-ը՝ հանրապետականները։ Ընտրությունները կկայանան նոյեմբերի 3-ին, և հարցման արդյունքները մատնանշում են ռիսկեր հանրապետական մեծամասնության համար երկու պալատներում էլ։ Դժգոհությունը տարածվում է նաև վարչակազմի տնտեսական քաղաքականության վրա։ Ամերիկացիների 58%-ը կարծում է, որ Թրամփի գործողությունները վնասում են երկրին, 28%-ը՝ որ դրանք օգտակար են, իսկ 14%-ը էական ազդեցություն չի տեսնում։ Հարցվածների միայն 18%-ն է նշել, որ իրենց ֆինանսական վիճակը բարելավվել է անցյալ տարվա համեմատ։ 38%-ի համար այն չի փոխվել, իսկ 44%-ը հայտնել է վատթարացման մասին։ Տնտեսությունը երկրի կարևորագույն խնդիրն է անվանել հարցվածների 31%-ը։ Բենզինի գների աճը լուրջ կամ չափավոր լուրջ խնդիր է համարում 67%-ը։ Հարցման բազմաթիվ մասնակիցներ պատմել են, որ սկսել են փոխել սննդամթերքի սովորական գնումները, կրճատել անհրաժեշտ ապրանքների և ծառայությունների ծախսերը, ավելի քիչ օգտվել էլեկտրականությունից, վերանայել ուղևորությունների ծրագրերը կամ հետաձգել խոշոր գնումները։ Նախագահի աշխատանքի առանձին ուղղություններով հավանության ցուցանիշները նույնպես բարձր չեն․ 27%-ը դրական է գնահատում նրա գործողությունները կենսապահովման արժեքի հարցում, 29%-ը՝ Իրանի հետ պատերազմի նկատմամբ մոտեցումը, իսկ 33%-ը՝ արհեստական բանականության ոլորտի քաղաքականությունը։ Ամենաբարձր արդյունքը Թրամփը ստացել է սահմանների պաշտպանության և ներգաղթի հարցերում՝ 43%։ Բացասական վերաբերմունքը վերաբերում է նաև ԱՄՆ-ի երկու հիմնական կուսակցություններին։ Դեմոկրատական կուսակցությունը դրական է գնահատում հարցվածների 43%-ը, բացասական՝ 57%-ը։ Հանրապետականների դեպքում այս ցուցանիշները կազմում են համապատասխանաբար 37% և 63%։ Միաժամանակ ամերիկացիների 52%-ը կարծում է, որ Թրամփի վարչակազմը ավելի կոռումպացված է, քան նախորդ վարչակազմերը։ Եվս 56%-ը կարծում է, որ երկու կուսակցություններում էլ կոռուպցիան հավասարապես լուրջ է։ Ամերիկացիներին 5 հազար դոլար վճարելու Թրամփի խոստումը, եթե հանրապետականները պահպանեն վերահսկողությունը Կոնգրեսի նկատմամբ, նույնպես վստահություն չի ներշնչում․ հարցվածների 71%-ը կարծում է, որ նրանք հաստատ կամ, հավանաբար, նման վճարումներ չեն ստանա։ Հանրապետականների շրջանում, այդպես է պատասխանել 47%-ը, մինչդեռ 28%-ը հույս ունի ստանալ այդ գումարը։ Հարցումն անցկացվել է առցանց՝ սեպտեմբերի 28-ից հոկտեմբերի 12-ը, 19 135 չափահաս ամերիկացիների շրջանում։ Սխալանքի սահմանը կազմում է 2,6 տոկոսային կետ։