Բրիտանական The Economist ամսագիրը Բանգլադեշը ճանաչել է տարվա երկիր։ Ինչպես նշվում է խմբագրականում, հանրապետությունը նման ճանաչման է արժանացել զանգվածային բողոքի ցույցերի արդյունքում իշխանափոխության կապակցությամբ։
«Օգոստոսին ուսանողական բողոքի ցույցերը հանգեցրին [վարչապետ] Շեյխ Հասինայի հրաժարականին, ով 15 տարի ղեկավարում էր 175 միլիոնանոց երկիրը։ Ժամանակին անկախության համար [պայքարի] հերոսի դստեր՝ Շեյխ Հասինայի օրոք տնտեսական կտրուկ աճի ժամանակաշրջան էր։ Բայց նա սայթաքեց դեպի բռնաճնշումներ և կեղծեց ընտրությունները՝ բանտարկելով իր հակառակորդներին և հրամայելով անվտանգության ուժերին գնդակահարել ցուցարարներին», — ասվում է այնտեղ:
The Economist-ն ընդգծել է, որ «իսլամական ահաբեկչության վտանգը» երկրում մնում է, սակայն «անցումային գործընթացը մինչ այժմ հուսադրող է»։ Խաղաղության Նոբելյան մրցանակի դափնեկիր Մուհամմադ Յունուսի գլխավորած տեխնոկրատների ժամանակավոր կառավարությանն աջակցում են ուսանողները, բանակը, բիզնեսը և քաղաքացիական հասարակությունը։ Այն վերականգնեց կարգուկանոնը և կայունացրեց տնտեսությունը։ 2025 թվականին նա պետք է վերականգնի հարաբերությունները Հնդկաստանի հետ և որոշի, թե երբ պետք է անցկացնել ընտրություններ՝ ապահովելով դատարանների անաչառ լինելը և ընդդիմությանը ինքնակազմակերպվելու ժամանակ տալով»,- նշել է ամսագիրը։
«Դա հեշտ չի լինի։ Սակայն, դեսպոտին տապալելու և ավելի լիբերալ կառավարություն գնալու համար մենք Բանգլադեշն անվանեցինք տարվա երկիր»,- ասվում է հոդվածում։ Այս տարի հավակնորդների թվում էին նաև Արգենտինան, Լեհաստանը, Սիրիան և Հարավային Աֆրիկան, ըստ ամսագրի: The Economist-ը 12 տարի շարունակ շնորհում է տարվա երկիր կոչումը, իսկ անցյալ տարի հաղթող է ճանաչվել Հունաստանը: