Մենք ապրում ենք իշխանությունների հետ անհամաձայն բոլոր անձանց դասական քաղաքական հետապնդման պայմաններում։ Այս մասին հայտարարել է «Բարգավաճ Հայաստան» կուսակցության ներկայացուցիչ Արման Աբովյանը ՊԵԿ շենքի մոտ անցկացվող հանրահավաքում, որտեղ հարցաքննվում է կուսակցության առաջնորդ Գագիկ Ծառուկյանը։
Նրա խոսքով՝ տեղի ունեցողի վերաբերյալ իշխանությունները հստակ պատասխաններ չեն տալիս։ «Քաղաքական դրդապատճառներով սարքված գործ է, և իշխանություններն էլ դա չեն թաքցնում», — հավելել է Աբովյանը՝ ընդգծելով, որ ճնշում է գործադրվում այն մարդկանց և կազմակերպությունների նկատմամբ, որոնք այս կամ այն կերպ կապված են Ծառուկյանի հետ։
«Պետք է հստակ արձանագրել. երկրում չեն գործում ո՛չ ՍԴ-ն, ո՛չ օրինականությունը։ Եզրակացությունները յուրաքանչյուր ոք պետք է ինքն անի։ Մեր գործն արդար է։ Մենք շատ լավ հասկանում ենք, որ այն, ինչ տեղի է ունենում Գագիկ Ծառուկյանի հետ, վաղը կարող է պատահել ցանկացած քաղաքացու հետ, եթե նա դուր չգա իշխանություններին։ Ծառուկյանի խնդիրը միայն նրա խնդիրը չէ, այլ բոլորիս, և որքան շուտ մենք դա հասկանանք, այնքան ավելի արագ կհաջողվի երկիրը դուրս բերել ստեղծված իրավիճակից», — հայտարարել է Աբովյանը։