Ուկրաինայի նախագահ Վլադիմիր Զելենսկին Գերագույն Ռադային է ներկայացրել Սերգեյ Կորեցկիի թեկնածությունը վարչապետի պաշտոնում։ Այս մասին հայտնել է խորհրդարանի խոսնակ Ռուսլան Ստեֆանչուկը։ Կորեցկին ղեկավարում է պետական «Նաֆտոգազ» ընկերությունը։ Զելենսկին ասել է, որ նրան համարում է վարչապետի պաշտոնի համար ամենահարմար թեկնածուն։ Գերագույն Ռադան, ինչպես սպասվում է, նոր կաբինետի ընտրության քվեարկությունը կանցկացնի հուլիսի 16-ին։ Կորեցկին սովորել է Լուցկի պետական տեխնիկական համալսարանում: Ուսանողական տարիներին նա սկսել է աշխատել «Կոնտինուում»-ում, իսկ 2007 թվականին դարձել է խմբի կառավարման ընկերության ղեկավար, հետագայում պատասխանատու լինելով WOG բենզալցակայանների ցանցի զարգացման համար: 2022 թվականին Կորեցկին դարձել է «Ուկրնաֆտա»-ի և «Ուկրտատնաֆտա»-ի ղեկավար, իսկ 2025 թվականին հաղթել է «Նաֆտոգազի» ղեկավարի մրցույթում: Ուկրաինայի վարչապետ Յուլիա Սվիրիդենկոն հրաժարական է տվել այս շաբաթվա սկզբին։ Ըստ լուրերի՝ նրան առաջարկվել է ԱՄՆ-ում Ուկրաինայի դեսպանի պաշտոնը, սակայն նա հրաժարվել է։ «Ժողովրդի ծառա» խմբակցության աղբյուրներն էլ «Ուկրաինսկայա պրավդա»-ին հայտնել են, որ Զելենսկին չի առաջադրի Միխայիլ Ֆյոդորովի թեկնածությունը պաշտպանության նախարարի պաշտոնում։ Լրատվամիջոցի աղբյուրի համաձայն՝ նախագահը խմբակցության նիստում ասել է, որ Ֆյոդորովը համակարգային հակամարտություն ունի Ուկրաինայի զինված ուժերի գլխավոր հրամանատար Ալեքսանդր Սիրսկիի և բանակի հետ, որը «չի կարող լուծվել»: «Նա [նախագահը] ասել է, որ իդեալական տարբերակը կլինի ազատել և՛ Ֆյոդորովին, և՛ Սիրսկիին, բայց նա դա հիմա չի կարող անել»,- նշել է աղբյուրը։ Ֆյոդորովը, ըստ էության, հաստատել է հրաժարականը հուլիսի 15-ի երեկոյան՝ սոցիալական ցանցերում գրելով նախարարությունում իր պաշտոնավարման ընթացքում ունեցած նվաճումների մասին: Ներքին գործերի նախարար Իգոր Կլիմենկոն համարվում է պաշտպանության նախարարի պաշտոնի հիմնական հավակնորդը, հաղորդում է ՌԲԿ-Ուկրաինան՝ հղում անելով աղբյուրին: Աղբյուրի համաձայն՝ Զելենսկին կարծում է, որ Կլիմենկոն կկարողանա կարգուկանոն հաստատել մոբիլիզացիայի հետ կապված գործընթացում:
2026-07-16