Հարավային Կորեան պատժամիջոցներ է մտցնում 15 ֆիզիկական անձանց եւ մեկ կազմակերպության դեմ՝ կապված Հյուսիսային Կորեայի IT ոլորտի հետ։ Այս մասին տեղեկացրել է Հարավային Կորեայի արտաքին գործերի նախարարությունը։
Նրա կարծիքով՝ Փհենյանի «ապօրինի գործունեությունը» կիբեռտարածությունում «ոչ միայն հանցագործություններ են, որոնք սպառնում են կիբեռտարածության էկոհամակարգի անվտանգությանը, այլեւ օգտագործվում են որպես հրթիռների եւ միջուկային զարգացման ֆինանսավորման միջոց» եւ, հետեւաբար, «վտանգ են ներկայացնում միջազգային խաղաղության եւ անվտանգության համար»:
Ըստ հարավկորեական կողմի՝ տեղեկատվական տեխնոլոգիաների հյուսիսկորեացի մասնագետները մեկնում են արտագնա աշխատանքի՝ ներառյալ Չինաստան, Հարավարեւելյան Ասիայի երկրներ եւ Ռուսաստան, որտեղ «թաքցնելով իրենց ինքնությունը»՝ ընդունում են պատվերներ ամբողջ աշխարհի ընկերություններից։ Ավելին, նրանցից ոմանք իբր մասնակցում են կիբեռհարձակումների։
Այս առնչությամբ Հարավային Կորեայի իշխանությունները «անկախ պատժամիջոցների ցանկում ընդգրկել են հյուսիսկորեական 15 հոգու ՏՏ ընկերությունների աշխատակիցներից եւ 1 կազմակերպություն», որոնք, նրանց կարծիքով, «միջուկային եւ հրթիռային մշակման համար ֆինանսական ռեսուրսներ են ձեռք բերել՝ վաստակելով արտարժույթ արտասահմանում»:
Պատժամիջոցները կսկսեն գործել դեկտեմբերի 30-ից։ Այս անձանց հետ արժութային եւ ֆինանսական գործարքների համար կպահանջվի Հարավային Կորեայի իշխանությունների նախնական թույլտվությունը: