ԱՄՆ նորընտիր նախագահ Դոնալդ Թրամփը լրջորեն է տրամադրված Գրենլանդիան ձեռք բերելու հարցում, այդ թվում՝ Արեւմտյան կիսագնդում Միացյալ Նահանգների ազդեցության գոտին ընդլայնելու համար։ Այս մասին հայտնել է Reuters գործակալությունը՝ հղում կատարելով աղբյուրներին։
Դրանցից մեկի համաձայն՝ Թրամփը դժվար թե դիմի ռազմական ուժի Գրենլանդիայի նկատմամբ վերահսկողություն հաստատելու համար։ Սակայն, նշել են Reuters-ի զրուցակիցները, Թրամփը պատրաստվում է այլ միջոցներ կիրառել, օրինակ՝ դիվանագիտական կամ տնտեսական ճնշում գործադրել Դանիայի վրա։ Թրամփի դաշնակիցներից մեկը նշել է, որ տեսել է արտաքին քաղաքականության առաջնահերթությունների ցանկը, որը կազմվել է Թրամփի բարձրաստիճան պաշտոնյաների կողմից նոյեմբերի 5-ի նախագահական ընտրություններում նրա հաղթանակից հետո: Կետերից մեկը «Գրենլանդիայի գնումն էր»,- նշել է նա:
Քննարկումներին ծանոթ Թրամփի ներկայիս եւ նախկին երեք օգնականների խոսքով՝ նորընտիր նախագահը նաեւ շահագրգռված է տարածքի ընդլայնմամբ՝ որպես ժառանգություն ստեղծելու միջոց, որը կհիշվի սերունդների կողմից: «Իրական ժառանգությունը Միացյալ Նահանգների ընդլայնումն է»,- ասել է աղբյուրներից մեկը:
Եթե Թրամփն իր նախագահության առաջին ժամկետի ժամանակ հպանցիկ նշել է Գրենլանդիան ձեռք բերելու հնարավորության մասին, նրա վերջին մեկնաբանություններն ընդգծում են, որ նրա ցանկությունը խորապես արմատացած ձգտում է եւ ոչ թե անցողիկ ցանկություն, գրել է գործակալությունը։