Մեծ Բրիտանիայի նախկին վարչապետ Բորիս Ջոնսոնը վստահ է, որ երկրի նախկին ղեկավարներից մեկը՝ Ուինսթոն Չերչիլը, կվարվեր այնպես, ինչպես հիմա վարվում է Ուկրաինայի նախագահ Վլադիմիր Զելենսկին։ Ինչպես հաղորդում է European Pravda-ն, այս մասին նա հայտարարել է Վիկտոր Պինչուկ հիմնադրամի կողմից Կիեւում կազմակերպված հատուկ հանդիպման ժամանակ։
«Չերչիլը կաներ նույնը, ինչ անում է Զելենսկին. Եվ նա Թրամփի առաջ խոսքերը չէր փնտրի»,- համոզված է Ջոնսոնը։
Նա նաեւ քննադատել է Դոնալդ Թրամփի հայտարարությունները պատերազմ սկսելու հարցում Ուկրաինայի մեղավորության մասին. «Այս տրամաբանությամբ ամերիկացիները հրահրեցին Ճապոնիայի հարձակումը Փերլ Հարբորի վրա»,- հեգնանքով ասել է նա։
Ջոնսոնը խոստովանում է, որ ԱՄՆ ներկայիս քաղաքականությունը «հակասում է Ուկրաինային աջակցելու կուրսին»։
«Իրականությունը, որ առաջարկում են ամերիկացիները, ես չեմ կարող ընդունել, քանի որ սիրտ ունեմ։ Խոսքը, մասնավորապես, հանքային ռեսուրսների վերաբերյալ գործարքի մասին է»,- պարզաբանել է նա։
Այնուամենայնիվ, Ջոնսոնը ըմբռնումով է մոտենում Թրամփի պահանջներին, որ Ուկրաինան պետք է փոխհատուցի իր տրամադրած աջակցությունը։ Նա, մասնավորապես, հիշեցրել է, որ Մեծ Բրիտանիան դադարեցրել է ամերիկյան Lend-Lease-ի վճարումը, որը տրամադրվում էր Երկրորդ համաշխարհային պատերազմի տարիներին, միայն 2006-ին:
Նա նաև կարծում է, որ նախագահ Թրամփի գործողությունների հիմնական նպատակը «եվրոպական ներգրավվածության մեծացումն է»։
«Մենք պետք է իրատես լինենք, բայց պետք է մշակենք մեր լուծումները։ Մասնավորապես, նա դեմ չէ խաղաղապահներին ուկրաինական հողում, ուստի եկեք դա անենք»,- ամփոփել է Բորիս Ջոնսոնը: