Միացյալ Նահանգները վճռական է լրացուցիչ մաքսատուրքեր սահմանել Եվրամիության (ԵՄ) ներմուծման համար: Այս մասին կիրակի երեկոյան Վաշինգտոնի մերձակայքում գտնվող Էնդրյուս ռազմաբազայում լրագրողների հետ զրույցում հայտարարել է ԱՄՆ նախագահ Դոնալդ Թրամփը՝ Ֆլորիդայում գտնվող Մար-ա-Լագոյի կալվածքից վերադառնալիս։
«Դա անպայման տեղի կունենա Եվրամիության հետ կապված, դա կարող եմ ձեզ ասել։ Որովհետև նրանք իսկապես օգտվում են մեզնից»,- ընդգծել է ամերիկացի առաջնորդը՝ մեկնաբանելով Վաշինգտոնի՝ ներմուծման լրացուցիչ մաքսատուրքերը սահմանելու թեման։ Նա պարզաբանել է, որ ԱՄՆ-ն մտադիր է «շատ շուտով» ընդունել այդ պրոտեկցիոնիստական միջոցները ԵՄ-ի հետ առևտրում։
Միևնույն ժամանակ Թրամփը նշել է, որ ԵՄ-ի հետ երկկողմ առևտրի դեֆիցիտը գերազանցում է 300-350 միլիարդ դոլարը։ «Նրանք գրեթե ոչինչ չեն գնում։ Եվ մենք ամեն ինչ գնում ենք նրանցից», — ասել է Թրամփը: Նրա կարծիքով՝ «Եվրամիությունը իրեն լիովին ոչ պատշաճ կերպով է պահում»։ «Իհարկե, ինչ-որ բան պետք է լինի»,- կրկնել է նա։
Նախագահը նաև քննադատել է Միացյալ Նահանգների նկատմամբ Բրիտանիայի առևտրային քաղաքականությունը։ «Բայց ես կարծում եմ, որ դա հնարավոր է լուծել»,- հավելել է Թրամփը։ Նա նշել է, որ «շատ լավ» հարաբերություններ ունի Մեծ Բրիտանիայի վարչապետ Քիր Սթարմերի հետ: