Չինաստանի նախագահ Սի Ցզինպինը Ռուսաստանի նախագահ Վլադիմիր Պուտինի հետ հեռախոսազրույցի ընթացքում Չինաստանին և Ռուսաստանին իսկական ընկերներ է անվանել, որոնք փոխադարձ աջակցություն են ցուցաբերում իրար։ Այս մասին հայտնում է Xinhua գործակալությունը։
Չինաստանի ղեկավարը մատնանշել է Պեկինի և Մոսկվայի միջև պահպանվող հարաբերությունների բարիդրացիական բնույթը։ Նրա խոսքով, Չինաստանն ու Ռուսաստանը «կիսում են խնդիրներն ու դժվարությունները՝ հասնելով ընդհանուր զարգացման»։
Ինչպես պարզաբանել է Սի Ցզինպինը ՌԴ նախագահ Վլադիմիր Պուտինի հետ հեռախոսազրույցի ժամանակ, Չինաստանի համագործակցությունը Ռուսաստանի հետ ուղղված չէ որևէ երրորդ կողմի դեմ։ Նա ընդգծել է, որ երկու պետությունների հարաբերությունները ենթակա չեն արտաքին միջամտության։
«Չինաստանի և Ռուսաստանի զարգացման ռազմավարությունները և արտաքին քաղաքականությունը նախատեսված են երկարաժամկետ հեռանկարի համար։ «Անկախ միջազգային իրավիճակի փոփոխություններից՝ չին-ռուսական հարաբերությունները կզարգանան հանգիստ»,- գործակալությունը մեջբերում է Չինաստանի ղեկավարի խոսքերը, որը նաև նշել է, որ այդ հարաբերությունները կայունություն և դրական էներգիա են բերում միջազգային հարաբերություններին։