«Կարծիք»-ին հասած հավաստի տեղեկությունների համաձայն՝ Գորիսի համայնքապետ Առուշ Առուշանյանը Ռոբերտ Քոչարյանի «դաբրոյով» և ուղղակի հորդորով է մտել «Քաղաքացիական պայմանագիր» (ՔՊ) կուսակցության շարքերը, որպեսզի կարողանա որոշակի բիզնես նախագծերի և շահերի համար արտոնյալ պայմաններ ու հովանավորչություն ապահովել։ Այս քաղաքական-բիզնես գործարքի և պայմանավորվածությունների շրջանակում էլ Հայաստանում բացվում է Toyota մակնիշի ավտոմեքենաների ներկրմամբ զբաղվող երկրորդ ընկերությունը, որը պատկանում է հանրությանը հայտնի «Toyota-յի Վահեին»։ Վերջինս երկար տարիներ եղել է Ռոբերտ Քոչարյանի մերձավոր շրջապատի ներկայացուցիչը և ղեկավարել է «Տոյոտա Երևան Սերվիս» ընկերությունը։ Սա դեռևս սպասվող բացահայտումների մի փոքր մասն է, և առաջիկայում «Կարծիք»-ը հանդես կգա նոր մանրամասներով, քանի որ այս բիզնես արտոնությունների դիմաց Առուշ Առուշանյանը, ինչպես նաև 2021 թվականին և դրանից առաջ Ռոբերտ Քոչարյանի հետ ասոցացվող կամ նրա անմիջական ազդեցության տակ գտնվող մի շարք անձինք, այսօր հենց Քոչարյանի հրահանգով առաջիկա ՏԻՄ ընտրություններում սատարելու են Նիկոլ Փաշինյանին։ Այսպիսով, քաղաքական դաշտում ականատեսն ենք լինում շահերի նոր վերադասավորման, որտեղ նախկին ընդդիմադիր կոշտ հռետորաբանությունը զիջում է իր տեղը ստվերային պայմանավորվածություններին։ Բիզնես արտոնությունների և քաղաքական ազդեցության պահպանման դիմաց նախկինում Քոչարյանի ճամբարում գտնվող գործիչներն այսօր դառնում են իշխանական հենարան՝ հերթական անգամ ապացուցելով, որ քաղաքական վերնախավի համար սեփական շահերն ու ազդեցության գոտիները վեր են ցանկացած գաղափարական սկզբունքներից։