Թուրքիան շարունակում է բանակցությունները ԱՄՆ-ի հետ Անկարայի համար կառուցված վեց F-35 կործանիչների փոխանցման շուրջ և հույս ունի ամերիկյան այն պատժամիջոցների վերացմանը, որոնք սահմանափակում են համագործակցությունը պաշտպանական ոլորտում, հայտնում է Turkish Minute-ը։ «ԱՄՆ իշխանությունների հետ մեր երկրի համար արտադրված վեց F-35 կործանիչների մատակարարման հարցով մեր շփումները շարունակվում են»,- ասվում է Թուրքիայի պաշտպանության նախարարության հայտարարության մեջ, որը հրապարակվել է մամուլի համար նախատեսված շաբաթական ճեպազրույցից հետո։ Անկարան միաժամանակ Վաշինգտոնին կոչ է արել չեղարկել CAATSA օրենքին համապատասխան սահմանված պատժամիջոցները, ինչպես նաև վերացնել թուրքական պաշտպանական արդյունաբերության նկատմամբ բոլոր ուղղակի և անուղղակի սահմանափակումները։ Նախարարությունում այդ միջոցները դաշնակցային հարաբերությունների սկզբունքների հետ անհամատեղելի են համարում և հույս են հայտնել իրավիճակի բարենպաստ հանգուցալուծման վերաբերյալ՝ հաշվի առնելով երկու երկրների փոխադարձ շահերը։ ԱՄՆ-ը պատժամիջոցներ սահմանեց Թուրքիայի դեմ 2020 թվականին, երբ Անկարան ձեռք բերեց ռուսական С-400 զենիթահրթիռային համալիրները։ 2019 թվականին Վաշինգտոնը Թուրքիային դուրս բերեց F-35 ծրագրից՝ դա բացատրելով այն մտահոգությամբ, որ ռուսական հակաօդային պաշտպանության համակարգերի և ամերիկյան ցածր նկատելիությամբ կործանիչների համատեղ օգտագործումը կարող է վտանգի տակ դնել ինքնաթիռի գաղտնի տեխնոլոգիաները։ Թուրքիան նախկինում ծրագրում էր ձեռք բերել շուրջ 100 F-35 և մասնակցում էր այդ ինքնաթիռների բաղադրիչների արտադրությանը։ Անկարան հայտարարել էր, որ ծրագրում շուրջ 1,4 միլիարդ դոլար է ներդրել։ 2026 թվականի հուլիսին Անկարայում անցկացված ՆԱՏՕ-ի գագաթնաժողովում ԱՄՆ նախագահ Դոնալդ Թրամփը չէր բացառել պատժամիջոցների վերացման և կործանիչների մատակարարման հարցի վերանայման հնարավորությունը։ Սակայն հոկտեմբերի 15-ի դրությամբ ինքնաթիռների փոխանցման վերաբերյալ համաձայնագիրը և սահմանափակումների վերացման ժամկետները պաշտոնապես չեն հայտարարվել։