Երկուշաբթի օրվա սակարկությունների արդյունքում եվրոպական ֆոնդային ինդեքսներն աճել են։ Դրան նպաստել է նավթի գների շարունակական անկումը, ինչը մեղմել է գնաճի սրման վերաբերյալ մտավախությունները և շուկաներում մեծացրել ռիսկի դիմելու հակվածությունը։ Տարածաշրջանի խոշորագույն ընկերությունների Stoxx Europe 600 ամփոփիչ ինդեքսը բարձրացել է 1,02%-ով՝ հասնելով 641,93 կետի։ Բրիտանական FTSE 100 ցուցիչն աճել է 0,75%-ով, գերմանական DAX-ը՝ 1,07%-ով, ֆրանսիական CAC 40-ը՝ 0,92%-ով, իտալական FTSE MIB-ը՝ 1,6%-ով, իսկ իսպանական IBEX 35-ը՝ 1,08%-ով։ Երկուշաբթի օրը Brent տեսակի նավթի գինը սեպտեմբերի 9-ից ի վեր առաջին անգամ իջել է 100 դոլարից (մեկ բարելի դիմաց)։ Սա պայմանավորված է ԱՄՆ-ի և Իրանի միջև հակամարտության կարգավորման դիվանագիտական ջանքերի վերսկսման հույսերով։ Ֆրանսիայում ուշադրության կենտրոնում է շարունակել մնալ պետական բյուջեի վիճակը։ Երկրի Հաշվեքննիչ պալատի նախագահ Ամելի դը Մոնշալենը Parisien պարբերականին տված հարցազրույցում նշել է, որ պետական պարտքի սպասարկման ծախսերը մինչև 2030 թվականը կաճեն՝ տարեկան հասնելով 100 միլիարդ եվրոյի։ Այս շաբաթ շուկաների համար առանցքային իրադարձություններից է լինելու Թրամփի և Չինաստանի ղեկավար Սի Ծինփինի հանդիպումը։ Դրան ընդառաջ՝ երկու երկրների ներկայացուցիչները հայտնել են առևտրի և արհեստական բանականության զարգացման հարցերի շուրջ հաջող խորհրդակցությունների մասին։ Երկուշաբթի օրը Stoxx Europe 600-ի ցանկում աճի առաջատարը լեհական mBank-ն էր (+8,3%)։ Դրական դինամիկա են գրանցել նաև բանկային ոլորտի այլ ներկայացուցիչներ, այդ թվում՝ Erste Bank Polska-ն (+5,5%), Banco BPM-ը (+4,3%), UniCredit-ը (+3,2%), Commerzbank-ը (+3%), FinecoBank-ը (+2,3%), Bankinter-ը (+2,2%), Banco de Sabadell-ը (+2,1%), Barclays-ը (+1,9%) և Societe Generale-ը (+1,8%)։ Նկատելիորեն ավելացել է տեխնոլոգիական ընկերությունների շուկայական արժեքը. Soitec-ը գրանցել է 9,8%, Aixtron-ը՝ 5,1%, Infineon Technologies-ը՝ 4,5%, ASML Holding-ը՝ 2,5%, իսկ STMicroelectronics-ը՝ 2,1% աճ։ Շվեյցարական լոգիստիկ հսկա Kuehne+Nagel-ի բաժնետոմսերը թանկացել են 5,4%-ով այն բանից հետո, երբ ընկերությունը հայտարարեց Amazon.com-ի հետ երկարաժամկետ ռազմավարական համագործակցության մասին։ Ամփոփիչ ինդեքսում ամենամեծ անկումը գրանցել են Novo Nordisk-ի բաժնետոմսերը (-7,7%)։ Դանիական դեղագործական հսկան հայտարարել է, որ ակնկալում է մինչև 2035 թվականը մշակման փուլում գտնվող դեղամիջոցների վաճառքից ստացվող հասույթը հասցնել 150 մլրդ դանիական կրոնի (23 մլրդ դոլար), իսկ 2026-2030 թվականներին ծրագրում է հասույթն ավելացնել շուկայի միջին տարեկան տեմպերով։ Այս կանխատեսումը հիասթափեցրել է ներդրողներին, որոնք ակնկալում էին ընկերության դիրքերի ամրապնդմանն ուղղված քայլերի ավելի հստակ ներկայացում։ Նավթի գների անկումը բացասաբար է ազդել նավթավերամշակող ընկերությունների գնանշումների վրա։ Equinor-ի կապիտալիզացիան նվազել է 3,4%-ով, BP Plc-ինը՝ 2,8%-ով, Shell-ինը՝ 1,4%-ով, Repsol-ինը՝ 1,3%-ով, TotalEnergies-ինը՝ 1%-ով, իսկ Eni-ինը՝ 0,9%-ով։