Իրանի զինված ուժերի հզորությունն ու երկրի ներուժը զգալիորեն ավելացել են ԱՄՆ-ի և Իսրայելի հետ պատերազմի ընթացքում, հայտարարել է Իրանի խորհրդարանի խոսնակ Մոհամմադ Բաղեր Ղալիբաֆը։ «Մենք պետք է բավականաչափ ուժեղ լինենք, որպեսզի ԱՄՆ-ը, ամբողջ աշխարհը և տարածաշրջանը հասկանան՝ իրենց չի հաջողվի հասնել իրենց նպատակներին», - ասել է նա Միացյալ Նահանգների հետ շարունակվող հակամարտությանը նվիրված ուղերձում։ Նրա ելույթը հեռարձակել է ազգային հեռուստատեսությունը։ «Ագրեսիվ պատերազմի ընթացքում Իրանի կրակային հզորությունը, հակաօդային պաշտպանության համակարգի հնարավորությունները և հարձակողական ներուժը զգալիորեն աճել են։ Մենք պետք է ամբողջ ուժով կռվենք, երբ իրավիճակը դա պահանջի», - ընդգծել է խոսնակը։ Նա նշել է, որ պատերազմից, բանակցություններից և զսպումից բաղկացած ցիկլը կշարունակվի այնքան ժամանակ, քանի դեռ Իրանը այնքան ուժեղ չի դառնա, որ հակառակորդները նույնիսկ չմտածեն հարձակման մասին։ «ԱՄՆ-ը պետք է փոխի իր վարքագիծը և ընդունի իրանցի ժողովրդի օրինական պահանջները։ Ամեն անգամ, երբ ռազմի դաշտում ռազմական հաղթանակ ենք տանում, մենք պետք է այն ամրագրենք քաղաքական ոլորտում», - ավելացրել է Ղալիբաֆը։ Իրանի խորհրդարանի խոսնակը նաև նշել է, որ երկիրը պետք է պատրաստ լինի պատերազմի, նույնիսկ ԱՄՆ-ի հետ բանակցություններ վարելիս, և գլխավոր խնդիրը ամերիկյան կրկնակի հարձակումը թույլ չտալն է։ Միևնույն ժամանակ նա նկատել է, որ Վաշինգտոնի հետ համաձայնագրի ստորագրումը որևէ երաշխիք չի տալիս։ «Նրանք խախտում են իրենց խոստումները, - դժգոհել է Ղալիբաֆը։ - Ստեղծված իրավիճակում Իրանը պետք է պատրաստ լինի հակահարված տալ ագրեսոր թշնամուն, և մենք պետք է ռազմի դաշտում իսկական արիություն ցուցաբերենք։ Միայն այդպես մենք կկարողանանք ապահովել կայուն զսպում»։