Թուրքիայում 2026 թվականի նոյեմբերի 1-ից ուժի մեջ կմտնեն երեխաների կողմից սոցիալական ցանցերի օգտագործման նոր սահմանափակումները։ Հարթակներին կարգելվի ծառայություններ մատուցել 15 տարեկանից ցածր օգտատերերին, իսկ ավելի բարձր տարիքի դեռահասների համար կսահմանվեն լրացուցիչ սահմանափակումներ, հայտնում են թուրքական Anadolu Ajansı և Cumhuriyet պարբերականները։ Համապատասխան կանոնակարգը հոկտեմբերի 10-ին հրապարակվել է կառավարության Resmî Gazete պաշտոնական տեղեկագրում։ Փաստաթուղթը սոցիալական ցանցերին պարտավորեցնում է ստուգել օգտատերերի տարիքը և թույլ չտալ հաշիվների ստեղծումը 15 տարին չլրացած երեխաներին։ Տարիքի ստուգումն իրականացվելու է e-Devlet պետական էլեկտրոնային ծառայությունների համակարգի միջոցով։ Ընդ որում, հրապարակված կանոնների համաձայն, համակարգը պետք է հաստատի օգտատիրոջ տարիքային կատեգորիան՝ առանց հարթակին նրա ամբողջական անձնական տվյալները հայտնելու անհրաժեշտության։ 15-ից 18 տարեկան օգտատերերի համար նախատեսված են անվտանգության հատուկ կարգավորումներ։ Նրանց էջերն ի սկզբանե լինելու են փակ, ուղիղ հեռարձակումներ անցկացնելու հնարավորությունն արգելվելու է, իսկ անձնական հաղորդագրություններ դեռահասները կկարողանան ստանալ միայն այն էջերից, որոնց հետևում են։ Հարթակներին կարգելվի նաև անհատականացված գովազդ ցուցադրել նման օգտատերերին։ Բացի այդ, սոցիալական ցանցերը պարտավոր կլինեն ծնողներին տրամադրել վերահսկողության գործիքներ, որոնք թույլ կտան սահմանափակել հարթակներից օգտվելու ժամանակը, կառավարել մանկական հաշիվների կարգավորումներն ու վերահսկել վճարովի գործարքները։ Գոյություն ունեցող հաշիվների օգտատերերի տարիքի ստուգման համար ժամանակ է տրվել մինչև 2027 թվականի մարտի 31-ը։ Ստուգման ընթացքում հայտնաբերված 15 տարեկանից ցածր օգտատերերի հաշիվները ենթակա են փակման։ Նոր կանոններն ուղղված են համացանցում երեխաների պաշտպանության ուժեղացմանը և հնարավոր վտանգավոր բովանդակության նկատմամբ նրանց հասանելիության սահմանափակմանը։