Պրահայում հետաքննում են միլիարդատեր Մարտին Դրդայի տան գիշերային հրդեհը։ Նա չեխական STV Group սպառազինության խմբի սեփականատերն է, որը Ուկրաինային զինամթերք և ռազմական տեխնիկա է մատակարարում, հայտնում է Novinky-ն։ Ոստիկանությունը չի բացառում, որ հրդեհի պատճառ կարող էին լինել տեխնիկական անսարքությունը, անզգուշությունը կամ դիտավորյալ հրկիզումը։ Վնասը գնահատվել է 200 հազար չեխական կրոն։ Հրդեհը տեղի է ունեցել Կունրատիցե շրջանում՝ կեսգիշերից մոտ կես ժամ առաջ։ Հարևանները նկատել են բոցերը տան մուտքի մոտ և կանչել արտակարգ ծառայություններին։ Կրակը բռնկվել է ավտոտնակի մոտ, ապա մասամբ տարածվել է շենքի ջերմամեկուսացման և արտաքին երեսպատման վրա։ Դեպքի վայր է ուղարկվել հրշեջ խումբ, որը մարել է մոտ մեկ քառակուսի մետր տարածք ընդգրկած հրդեհը։ Հրշեջները ստիպված են եղել ապամոնտաժել երեսպատման մի մասը և ջերմատեսիլ սարքով ստուգել կառուցվածքը, որպեսզի համոզվեն, որ ներսում այրման օջախներ չեն մնացել։ Դրանից հետո հետաքննությանը միացել է ոստիկանությունը։ «Ներկայում քրեագետները հրշեջ ծառայության մասնագետների հետ միասին ստուգում են հրդեհի առաջացման բոլոր հանգամանքներն ու պատճառները»,- հայտնել է ոստիկանության ներկայացուցիչ Ռիխարդ Հրդինան։ Քննիչները առայժմ չեն բացառել տեղի ունեցածի ոչ մի վարկած։ Հնարավոր պատճառների թվում դիտարկվում են տեխնիկական անսարքությունը, անզգուշությունը և դիտավորյալ հրկիզումը։ Հրդեհը տեղի է ունեցել եվրոպական պաշտպանական ձեռնարկություններին սպառնացող հնարավոր վտանգների վերաբերյալ նախազգուշացումների ֆոնին։ Հոկտեմբերի կեսերին Financial Times պարբերականը, հղում անելով եվրոպական հինգ հետախուզական ծառայությունների աղբյուրներին, հայտնել էր, որ զենք արտադրող ընկերությունների ղեկավարները կարող են դառնալ ռուսաստանցի գործակալների թիրախը։ Պարբերականի տվյալներով՝ առանձնահատուկ ռիսկի կարող են ենթարկվել նաև անօդաչու թռչող սարքերի և դրանց բաղադրիչների արտադրությամբ զբաղվող փոքր ձեռնարկությունների ղեկավարները։ Ռուսական գործողությունների աճող վտանգի մասին նախազգուշացրել էր նաև Չեխիայի Անվտանգության և տեղեկատվության ծառայության (BIS) ղեկավար Միխալ Կոուդելկան։ Նրա գնահատմամբ՝ առաջիկա ամիսներին Ռուսաստանը կարող է դիմել ավելի ռիսկային և լուրջ գործողությունների Չեխիայում կամ այլ ժողովրդավարական երկրներում։ Միևնույն ժամանակ ոստիկանությունը Ռուսաստանի, Ուկրաինային զենքի մատակարարումների կամ STV Group-ի գործունեության հետ հրդեհի հնարավոր կապի մասին չէր հայտնել։ Հնարավոր դիտավորյալ հրկիզումը մնում է հետաքննության միայն վարկածներից մեկը։